Thursday, August 21, 2014

JK azindua ujenzi Daraja la Kilombero


Rais Jakaya Kikwete.PICHA|MAKTABA 
Na Ally Mkoreha, MwananchiKilombero. Rais Jakaya Kikwete amezindua miradi miwili mikubwa ya kiuchumi na kijamii katika Wilaya za Ulanga na Kilombero, ukiwamo ujenzi wa Daraja la Mto Kilombero.
Akizungumza baada ya uzinduzi wa daraja hilo uliofanyika saa 1.20 usiku, Rais Kikwete alisema daraja hilo linalojengwa kwa Sh53.2 bilioni, litasaidia kuchochea ukuaji wa uchumi katika wilaya jirani zilizokuwa na tatizo kubwa la usafiri kwa muda mrefu.
Ujenzi wa daraja hilo uliokuwa ukisubiriwa kwa shauku na wananchi wa wilaya hizo ambao kwa muda mrefu wamekuwa wakipata mateso katika kuvuka mto huo ambao umetanguliwa na madaraja madogo zaidi ya 16 upande wa Kilombero.
Madaraja hayo ni kwa ajili ya kuunganisha tuta kubwa litakalounganishwa na daraja hilo refu, likiwa ni moja ya ahadi za Rais Kikwete alizotoa wakati akiwania nafasi hiyo katika kipindi cha pili.
Umati wa wananchi wa Kilombero kutoka maeneo ya karibu mahali linapojengwa daraja hilo, ulihudhuria uzinduzi wa ujenzi wa daraja hilo na wengi wao wakielezea kufarijika.
Kwa muda mrefu wananchi wa wilaya hizo wamekuwa wakitumia vivuko na mitumbwi isiyokuwa na uhakika kuvuka katika mto huo, jambo lililohatarisha usalama wao.
Baadhi ya wananchi, wamewahi kupoteza maisha walipokuwa wakivuka kutoka upande mmoja wa Mto Kilombero kwenda mwingine.
Tatizo hilo pia limekuwa likiathiri jitihada za wakulima wa mpunga katika wilaya hizo hasa kuyafikia masoko ya zao hilo kwa sababu ya ugumu wa kuvusha shehena katika mto huo.
“Ujenzi wa daraja hilo sasa ni ukombozi mkubwa kwetu maana mateso yetu katika kuvuka mto huu, yatakwisha. Tumeteseka na hakika sasa Serikali imesikiliza kilio chetu,” alisema mkazi wa Michenga wilayani Kilombero, Adriano Liyonga.
Alisema harakati za kuvuka katika Mto Kilombero, zimesababisha watu wengi katika wilaya za Ulanga na Kilombero kupoteza maisha na kwamba kuanza kwa ujenzi wa daraja hilo kutapunguza kero kubwa kwa wananchi.
Mkazi mwingine, Juliana Moses alisema: “Tunamshukuru Mungu, tunaishukuru Serikali yetu kwa kusikiliza kilio chetu cha muda mrefu kuhusu daraja katika mto huu. Ngoja tufurahi,”
Kauli hiyo iliungwa mkono na nduye Adriano, Aidan Liyonga aliyesema ujenzi wa daraja katika mto huo utaharakisha zaidi maendeleo ya kiuchumi katika wilaya hizo.
Mradi mwingine ambao Rais Kikwete aliuzindua jana ni wa umeme vijijini katika Tarafa ya Mwaya, wilayani Ulanga.
« PREV
NEXT »

No comments

Post a Comment