Writen by
sadataley
11:59 AM
-
0
Comments
Na Elizabeth Lobulu
Mkuu wa Kanisa la Kiinjili la Kilutheri Tanzania (KKKT), Askofu Dkt. Fredrick Onael Shoo, amewataka wana KKKT katika umoja wao kujitambua kwamba Kanisa la Kilutheri lilitokana na Matengenezo baada ya kukataa viashiria vya ushirikina katika masuala yanayohusu wokovu.
Mkuu wa KKKT akikemea baadhi ya watu wanaodiriki kudhalilishwa
badala ya kujifunza Neno la Mungu, kuliamini na kulitii.
Alipokuwa akiusalimu Mkutano Mkuu wa 24 wa KKKT Dayosisi ya Kaskazini Kati hivi karibuni alisema Biblia inatufundisha mambo mengi kuhusu imani. Askofu Dkt. Shoo alisema baada ya kujifunza Neno, tukaliamini na kulitii tutakapomwita Mungu atatutegemeza zaidi.
Aliwapongeza wana Dayosisi ya Kasakazini Kati kwa kuchagua kauli mbiu: “Mungu kwetu ni kimbilio na nguvu, msaada unaoonekana tele wakati wa mateso,” (Zab. 46: 1). Alisema Neno hilo ni ushuhuda kwamba Mungu ameonekana, akiwa msaada mkubwa kwa Dayosisi na kuwavusha katika msukosuko wa deni la hoteli ya Dayosisi ‘Corridor Springs’. Alinukuu Kitabu cha Yeremia “Niite nami nitakuonesha mambo makuu ya ajabu usiyoyajua.”
Alisema mara kwa mara inatupasa kukumbushana kwamba uaminifu, nguvu na fadhili za Mungu ni za milele na wala tusikubali kumwelekea mwanadamu au vitu kwani kufanya hivyo ni dalili kwamba imani kwa Mungu imepungua.
Dalili kwamba mkristo imani haiko kwa Mungu tena ni kama vile mtu akitaka kusafiri au akiuguliwa au kila anachotaka kufanya lazima amtafute kwanza ‘mtume’ au ‘mtumishi wa kumwombea’.
Badala ya kuwasogeza kwa Mungu baadhi ya watu kama hao wanawapeleka watu mbali na Mungu kwa kuwadanganya kwamba wakitaka wawe salama wanunue mafuta, maji, chumvi, picha ya mtumishi, nk., toka kwao. Au waende kwenye ibada ya kukanyaga mafuta au ‘fruto’.
“Mambo haya ndugu zangu ni ushirikina na ndiyo mambo yaliyomfanya mwasisi wa matengenezo akemee vitendo vya kutoza fedha kwa jina la kuwaokoa watu”, alisema Askofu Dkt. Shoo.
Dkt. Shoo alisema kuna washarika wanakwenda kwenye makanisa ambayo lengo kuu la viongozi wao ni kujitajirisha kwa kuwalaghai wafuasi kwa mbwembwe za kila aina.
Mkuu alisema imefika mahali kuna wanaojiita manabii ambao hawataki kusimama chini wanapohubiri ila waumini ndio wanaopaswa kuinama ili wasimame migongoni mwao. Baadhi ya ‘watumishi’ wanalindwa na walinzi wengi (bodyguards) japo wanawaelekeza wafuasi wao wanunue picha ya ‘mtumishi’ ili iwekwe kwenye gari iwalinde. Mbona wenyewe analindwa na ‘bodyguards?’ Alihoji.
Pia wapo kina mama wanaodhalilishwa na viongozi wa makundi kama hayo kwa kulazimishwa kufanya mambo fulani kabla ya kuwafanyia maombi. Baadhi wanawaambia wafuasi wao kama wana imani ya kweli wanywe sumu au wameze mijusi au nyoka. “Tusipoweka imani mahali sahihi tutafikishwa huko,” Mkuu alisema na kusisitiza kwamba tunapaswa kuweka imani yetu kwa Yesu Kristo ambaye damu yake ilimwagika kwa kifo chake msalabani.
Alisema kanisa linakemea imani hizi potofu na kuwaomba wana KKKT washiriki kikamilifu kumbukumbu ya miaka 500 ya Matengenezo ya Kanisa. Yapo mambo mbalimbali yamepangwa kufanyika katika ngazi ya sharika zote za KKKT, vituo, Dayosisi na ngazi ya kitaifa. Na kilele chake ni tarehe 1 – 8 Oktoba 2017.
Upandaji miti ni tendo kubwa linalofanyika na Walutheri kuashiria kuenea duniani kote kwa Matengenezo ya Kanisa yaliyoanzishwa na Martin Luther miaka 500 iliyopita. Bustani ya Luther imeanzishwa Ujerumani ambapo makanisa na taasasi mbalimbali zimepanda mti wa kumbukumbu jijini Wittenberg.
(Habari na Picha na Elizabeth Lobulu)
ELCT-website
No comments
Post a Comment