Writen by
sadataley
10:19 AM
-
0
Comments
Zanzibar. Kocha wa Simba, Patrick Phiri amesema soka la Tanzania
limejaa siasa hivyo amewaachia viongozi wa timu hiyo kuamua ni mchezaji
gani wa kigeni anafaa kuachwa baada ya kusajiliwa mshambuliaji Emmanuel
Okwi.
Juzi jioni Mwenyekiti wa Kamati ya Usajili ya
Simba, Zacharia Hans Pope, alimtangaza rasmi Okwi kuwa mchezaji mpya wa
Simba kwa msimu ujao wa Ligi Kuu Bara.
Mpaka jana mchana Okwi alikuwa hajajiunga na kambi
hiyo iliyopo visiwani hapa huku kukiwapo taarifa kuwa angewasili jana
muda wowote.
Simba ilipitisha majina ya wachezaji 28 wakiwamo
wachezaji watano wa kigeni ambao ni washambuliaji Amissi Tambwe, Raphael
Kiongera, Pierre Kwizera, Joseph Owino na Mosoti.
Usajili wa Okwi katika kikosi hicho unamaanisha
kwamba ni lazima mchezaji mmoja wa kigeni akatwe kwani hivi sasa wapo
sita na wanatakiwa wachezaji watano tu wa kigeni.
Phiri alisema kuwa mpaka sasa haelewi nini
kinaendelea kwani hakushirikishwa katika uamuzi huo hivyo jana Ijumaa
alikuwa anasubiri taarifa kutoka kwa viongozi wake juu ya usajili wa
Okwi na uamuzi wa mchezaji gani anaondolewa.
“Bado nipo gizani, nimesikia taarifa hizo, lakini
nasubiri taarifa ya viongozi, naamini uongozi wa Simba upo vizuri katika
kusajili hivyo mchezaji nitakayeletewa atakuwa mzuri maana wao
wamemwona na amewahi kuichezea Simba.
“Soka la Tanzania ni kama siasa hivyo tunatakiwa
kukubaliana na hali halisi, mimi ni mtaalamu wa benchi la ufundi, lakini
viongozi pia wana utaalamu wake, hivyo naamini usajili wao utakuwa
mzuri,” alisema Phiri.
Wakati huohuo, Simba leo usiku itacheza mechi ya
kirafiki dhidi ya KMKM kwenye Uwanja wa Amaan, Zanzibar. Hii itakuwa ni
mechi yao ya tatu ya kirafiki tangu waingie kambini visiwani hapa ambapo
mechi mbili zote walishinda. Mechi ya kwanza walicheza na Kilimani City
na kushinda mabao 2-1 wakati mechi ya pili waliifunga Mafunzo bao 2-0.
No comments
Post a Comment