Writen by
sadataley
5:51 PM
-
0
Comments
Taarifa hizi kuhusu mwelekeo wa mvua kwa miezi ya Oktoba- Desemba
zitatufaa sote na hivyo tuzitumie mijini na vijijini kwa ajili ya
kupanga na kuandaa mipango yetu ikiwamo safari za nchi kavu, angani au
baharini ambazo hakika zitatuepusha na majanga.PICHA|MAKTABA
Mamlaka ya Hali ya Hewa Tanzania (TMA) ni mojawapo ya wakala za
Serikali iliyoko chini ya Wizara ya Uchukuzi ambayo kwa siku za karibuni
imejiainisha kwa utendaji mzuri ambao hakuna siri kwamba unafaa kuigwa.
Tuna kila sababu ya kuelezea kuridhishwa na utendaji wa mamlaka hiyo wa kutimiza wajibu wake bila kulazimishwa.
Tunasema mfano huu wa kutoa habari zinazohusu
mvua, majanga bila ubabaishaji unaonyesha nia thabiti ya uongozi wake
kufanya kazi kwa weledi. Kwa maana hiyo, tunasema hawa wamekuwa mfano wa
kuigwa na wengine katika kutimiza wajibu waliokabidhiwa.
Kwa maana hiyo, ni jambo jema kuona mamlaka hiyo
imekuwa mstari wa mbele katika kutoa habari, maelezo na maelekezo kuhusu
mwelekeo wa hali ya hewa nchini kwa kipindi cha miezi mitatu ijayo,
kama ambavyo imefanya mwishoni mwa wiki.
Tofauti na siku za nyuma ambako TMA haikuaminika
na wakati mwingine kudharauliwa kutokana na taarifa zake nyingi kuwa za
kibabaishaji na zisizokuwa sahihi, siku hizi utabiri wake umekuwa wenye
uhakika. Sote ni mashuhuda wa jinsi ambavyo mamlaka hii imetabiri kwa
usahihi kuhusu majanga, yakiwamo yatokanayo na mvua, vimbunga, upepo
mkali katika baadhi ya maeneo ya nchi yetu na matukio hayo yakawa ya
kweli.
Kwa hiyo, hakuna shaka kwamba taarifa hizi kuhusu
mwelekeo wa mvua kwa miezi ya Oktoba- Desemba zitatufaa sote na hivyo
tuzitumie mijini na vijijini kwa ajili ya kupanga na kuandaa mipango
yetu ikiwamo safari za nchi kavu, angani au baharini ambazo hakika
zitatuepusha na majanga.
Kikubwa zaidi, taarifa hizi zinahusu sekta
mtambuka, hivyo lazima ziheshimiwe, zitumiwe vizuri na kila mmoja wetu
katika kupanga shughuli zetu zikiwamo kilimo, ufugaji, matumizi ya maji
na nyinginezo.
Tunashauri pia kwamba taarifa hizi zitumiwe kwa
manufaa badala ya kupuuzwa kama ambavyo imekuwa ikifanyika. Tunafahamu,
kwa mfano kilimo chetu ni chenye kutegemea mvua katika maeneo mengi
nchini , hivyo wakulima wanazitegemea taarifa kama hizi kwa maisha yao
ya kila siku ili kuchagua aina ya mazao wanayopaswa kulima.
Kwa maana hiyo, yatakuwa makosa makubwa kupuuza
utabiri kama huu na matokeo yake nchi yetu kujikuta katika majanga kama
ya ukame, upungufu wa chakula na mafuriko.
Tunasema ushauri wa TMA hauna budi uzingatiwe na
kila mmoja wetu, ikiwa ni pamoja na wakulima, wataalamu katika sekta
mbalimbali na watunga sera, hasa ikizingatiwa kuwa ushauri unatolewa
bure, tena kwa lugha nyepesi.
Kama tulivyosema hapo juu, utabiri huo una lengo
la kutupatia taarifa muhimu ambazo hatimaye zitatuepusha na maafa.
Hivyo, taarifa hizo zikifanyiwa kazi, zitatuondoa katika majuto, hasara
na mateso mengi ambayo yamekuwa yakitupata au mtu mmoja mmoja.
Kwa mfano, wakazi wa mabondeni kila mwaka
hutaabika wakati wa masika, huishi kwa hofu kutokana na kutopata taarifa
hizo na wakati mwingine kutoheshimu utabiri kama huo.
Tunazishauri idara nyingine za Serikali, hasa zenye wasemaji
walioajiriwa kwa kazi hiyo, lakini wameshindwa kutoa taarifa muhimu kwa
umma, waige mfano wa wenzao katika TMA.
Tunazishauri idara hizo za Serikali ambazo badala
ya kuwa sehemu ya vyanzo vya habari, zimekuwa zikificha habari, zitambue
kuwa jambo hilo kamwe halikubaliki.
No comments
Post a Comment